السلام عليكم ورحمة الله وبركاته
بقولكم سالفه حصلت لي اسمعوها زين وخذوا العلم من واحد مجرب
قبل اكثر من 3 سنوات تزوجت وسكنت في شقة لحالي مثل خلق الله
وعندما كنت ارتب الاثاث ركبت الدش والريسيفر وجبت العامل وصلح كل شي
تزوجت وسافرت شهر عسل وبعد مارجعت تعرفون الواحد هو وزوجته بذا البيت متقابلين عند ذا القنوات
وزوجتي ليست ملتزمه مره بس فيها خير كثير
مسكتني على جنب بعد زواجنا ب3 اشهر بعد ماطاحت الميانه قالت ياعبدالله والله اني متنكده من ذا الدش شله من بيتنا تكفى انا قلت عادي نتابع المباريات والاخبار
قالت: اهلك بيتنا جنب بيتهم واستراحتكم قريبه إذا بغيت تشوف المباريات رح في ملحق اهلك ولا في الاستراحه مع الشله وتابع على راحتك
قلت يصير خير
قالت اللهم قد بلغت اللهم فاشهد
بصراحه انا كنت ضد اني اخلي اهلي عند الدش حتى قبل زواجي ساكن مع الاهل امي وخواتي مايشوفون الدش ولا يحلمون فيه الدش موجود بملحق الرجال بس
المهم اني راجعت نفسي وتذكرت انني غاش لرعيتي وقلت ياولد دامني في اول مشواري خلني اقطع ذا الدش قبل لا يصير من الاولويات في البيت ويصير عندي عيال ويصير الوضع صعب بعدها
الوهو انني قررت ان اشيله وفلا جبت العامل وقشع الصحن واخذت الرسيفر وبعته
ومن بعدها لما وصل العلم لولد عمي وهو ملتزم على طول اتصل فيني وقال خير ماسويت يابوعابد وقال دشكم على
ومن بكره وهو جايب لي قنوات المجد11 قناه متنوعه
والحمد لله والله اني من بعدها وانا احس ان فعلا ان الله عوضني بشي خير من الدش صرت افرح في جلوسي بالبيت واعطاني الله حب لعائلتي بشكل غير طبيعي وتغيرت امور واجد في حياتي الزوجيه
والان لي ولدين الاول عمره سنتين وهو يتابع اطفال المجد وحفظ منهم كلمات رائعه مثل ان شاء الله وبسم الله
فعلا ان الطفل يتاثر باللي حوله
وهذي تجربتي والله اتمنى من الجميع اللي عندهم دش ان يجرب شهر يشيله والله ان يحصل راحه غير طبيعيه
والسلام عليكم ورحمة الله وبركاته
موضوع: قريت هالقصه وحبيت انكم تستفيدون منها 
الإثنين سبتمبر 08, 2008 11:12 pm
